يهز غصن الرجاء نسناس

الشاعر : نايف صقر

يهز غصن الرجاء نسناس   
وأنا اجمع الدمع من خده

لازلت احس بتعب واعماس   
يعاود البال من مده

لاباس ياخاطري لاباس   
السيف مايجرحه حده

والقلب لولا عليه اقواس   
لا فز بعروقه تصده

يمديه لاهزه الهوجاس   
يشقق الصدر ويقده

لي صاحب ناعم حساس   
اغليه بالحيل واوده

يقول لي في حشاه إحساس
مانيب كبره ولا قده

ويقول احبك واحس بياس   
والأمر ماهوب في يده

قلت أه يالمطرق المياس   
من طاري البعد والصده

في عيونه عيونه النعاس   
يبني لي الشوق ويهده

والظبي والليل والقرناس   
وما لا أقدر احصيه واعده

ياليتي اجمع قلوب الناس   
أشباه والضد مع ضده

واحبك بها بدون اقياس   
لين العمر ينتهي حده

يازين ما في البعاد اوناس   
ان كان لي كفك تمده

عطني لعيني بعدك انعاس   
لا تاخذ النوم وتلده

وعطني لنسيانك الاجراس   
وقلبي على مهجته رده

وأنا اوعدك واوعد القرطاس   
بالحب في اللين والشده

الرفيق اللي ليا غبت مايحمي قفاي

الشاعر : سلطان الهاجري

قصيدة الرفيق

 

الرفيق اللي ليا غبت مايحمي قفاي
اجل لامن صرت حاضر ماني في حاجته

احتمي دوري ودور القبيله من وراي
جمدو هرج الفراغات ياهراجته

كانها بمصامخ الروس ولا باي باي
خلو الفلم المدبلج على دبلاجته

طول عمري ماستمع من ضعيف الراي راي
ولاطمعت بديك خيبر ولا دجاجته

العداوة شي عادي تجيني من عداي
من نسج نسج العداوات عرفت نساجته

وإن كلاني مخلب من مخاليب أصدقاي
قلت ضاعت صيدته في طرف عجاجته

وإن ثناها مرة ثانية جعله فداي
لافسق كلب الخواجة كلا خواجته

الارض ماهي ورث ابي والسماء ماهو سماي
مير الاعوج لاعترض لي عدلت عواجته

أفردة واذوقه لمستين من عصاي
وأدبة تأديب طفل على دراجته

لين ينسى عناد راسه ويذكر مستواي
ينتبه ولا يسوهج على سوهاجته

في نظرة الناس مالون واهوه هاي هاي
والمدوج مابعد فاق من دواجته

أبك أنا لو اشرب البحر مايقطع ظماي
وانت مثل الضب يزحف تحت عجاجته

يامؤمن الريفي انا جيتك زبون

بن فطيس

يامؤمن الريفي انـا جيتـك زبـون
جيتك علي مدح اكثر الناس وعنيت

جيت وتعالـى الله عمـا يشركـون
لولاه يا مؤمن لطبـك مـا أهتديـت

راضي بحكم الله علي مهمـا يكـون
عالج عيوني لو بعد طبـك عميـت

ودي أخاشر في البصر من يبصرون
وأشوف دربي لاسرحت ولا ضويت

والاِ قنصت اثبت مع الـي يثبتـون
وأشوف طيري كل ما أوميت ودعيت

ياكثر مايضـرب خويـي الطبلـون
من كثر ما أكلتـه مطبـات وكليـت

ودي أشوف الِي علـي يعْرضـون
وبعض الليالي ودي أسري دون ليت

وأشوف ناس في القفا مايرحمـون
أمـا وقفـت لصاحبـي ولا مشيـت

من دون نظـاره ولاهـم يحزنـون
ياكثر ماكسـرت كشمـات وشريـت

لاكْـن يادكتـور جعلـك ماتـهـون
ابغيك كلمـه راس دامـك مابديـت

أسمع ولا أبغي الي وزانك يسمعون
ربي كتب يكشف لك اسراري وجيت

صوره عديل الروح عندك في العيون
وأخاف تقطعها بموسـك ماوعيـت

ولا عليك امر اطوها تحت الجفـون
وعقبه لو تقطع عيونـي ماشكيـت

هي راس مالي والعرب مايدركـون
أني علي باب الممات ومـا حكيـت

ياقـو قلبـي يـوم قفْـن الضعـون
ألـي علـي ذاك المـوادع مابكيـت

وياصبر صبري والعواذل يحسبـون
أني دلهت مـن الهـواا ولا سليـت

أسكت عساهم من سكاتي يسكتـون
وأنا عن اِلي في ضميري ماأنتهيـت

أدور الفرحه معـا اِلـي يسهـرون
وأن ذكروني خذت فنجال وسريـت

أخذت من وقتـك يادكتـور العيـون
عالج عيوني لو بعد طبـك عميـت

وأستر علي واِلي معـك لايفطنـون
أنت الوحيد اِلي بعـد ربـي دريـت