بن فطيس
يامؤمن الريفي انـا جيتـك زبـون
جيتك علي مدح اكثر الناس وعنيت
جيت وتعالـى الله عمـا يشركـون
لولاه يا مؤمن لطبـك مـا أهتديـت
راضي بحكم الله علي مهمـا يكـون
عالج عيوني لو بعد طبـك عميـت
ودي أخاشر في البصر من يبصرون
وأشوف دربي لاسرحت ولا ضويت
والاِ قنصت اثبت مع الـي يثبتـون
وأشوف طيري كل ما أوميت ودعيت
ياكثر مايضـرب خويـي الطبلـون
من كثر ما أكلتـه مطبـات وكليـت
ودي أشوف الِي علـي يعْرضـون
وبعض الليالي ودي أسري دون ليت
وأشوف ناس في القفا مايرحمـون
أمـا وقفـت لصاحبـي ولا مشيـت
من دون نظـاره ولاهـم يحزنـون
ياكثر ماكسـرت كشمـات وشريـت
لاكْـن يادكتـور جعلـك ماتـهـون
ابغيك كلمـه راس دامـك مابديـت
أسمع ولا أبغي الي وزانك يسمعون
ربي كتب يكشف لك اسراري وجيت
صوره عديل الروح عندك في العيون
وأخاف تقطعها بموسـك ماوعيـت
ولا عليك امر اطوها تحت الجفـون
وعقبه لو تقطع عيونـي ماشكيـت
هي راس مالي والعرب مايدركـون
أني علي باب الممات ومـا حكيـت
ياقـو قلبـي يـوم قفْـن الضعـون
ألـي علـي ذاك المـوادع مابكيـت
وياصبر صبري والعواذل يحسبـون
أني دلهت مـن الهـواا ولا سليـت
أسكت عساهم من سكاتي يسكتـون
وأنا عن اِلي في ضميري ماأنتهيـت
أدور الفرحه معـا اِلـي يسهـرون
وأن ذكروني خذت فنجال وسريـت
أخذت من وقتـك يادكتـور العيـون
عالج عيوني لو بعد طبـك عميـت
وأستر علي واِلي معـك لايفطنـون
أنت الوحيد اِلي بعـد ربـي دريـت
ليست هناك تعليقات:
إرسال تعليق